Os senadores do PP pola provincia de Lugo preguntaron o pasado mes de febreiro ao Goberno central polos prazos de execución e as cantidades económicas establecidas para as obras da autovía A-74, entre Barreiros e San Cibrao.
“A pregunta era moi concreta, pero a resposta do Goberno foi moi vaga”, sinalaron Rosa Arza, José Manuel Barreiro, Manuel Lorenzo Varela e Juan Carlos Serrano, que afearon ao executivo que “non concrete prazos”.
Na súa resposta, o Goberno di que “continúa impulsando” o desenvolvemento da A-74. Así, lembra que o 3 de decembro de 2021 aprobouse provisionalmente o proxecto de trazado do tramo Burela-Foz e o 26 de xaneiro de 2022 someteuse a información pública no Boletín Oficial do Estado. Ademais, indica que “unha vez se aprobe definitivamente o proxecto de trazado, continuarase co proxecto de construción”, aínda que sen concretar prazos.
Na exposición de motivos da súa pregunta, os populares destacan que a redacción do proxecto iniciouse no ano 2015 e “a súa execución quedou paralizada cando o PSOE chegou á Moncloa”. Así mesmo, subliñan a “importancia desta infraestrutura como vertebradora da comarca da Mariña co noroeste peninsular e co resto de Galicia, e como unha vía capaz de conectar estes territorios cun porto de tanta importancia como o de San Cibrao, cuxo potencial económico e turístico xera un aumento exponencial do tráfico na zona durante certos períodos do ano”.
